想再抵啲，記住訂位。

好友多次相約才能夾到日子之飯局，話去Hokahoka，我當然話好，因為多年前已經常到訪，而且食物水準不錯，仲要大部份是日本客。

到晩飯當天下午，我於whatsapp group問大家幾點會到尖東，攪手食友回覆地點是銅鑼灣，原來響京都廣場9樓之分店已開了一年多，差點去錯地方。

本身不太好日本清酒，不過有好嘢食就唔同啦，從攪手得知負責人其中生意是日本清酒供應商，亦是日本清酒愛好者，會親自與師傅以不同食材做出菜單之餘，再配上適合之清酒，所以不同時份會推出不同時令之套餐配上清酒。

而今期推出之日本清酒配菜套餐(八)，是一個二人套餐，價錢分為$1,180及$1280(未連加一)，當中包括了九道菜，前者配一支300ml、而後者則配一支720ml之純米吟釀，想再抵啲，記住打去訂位，因為如果提早預訂前者只需$880，而後者亦只需$980，都幾划算。

蓬萊泉 和 純米吟釀

這支愛知縣 關谷酒造 蓬萊泉 和 純米吟釀，成個套餐九道菜，都是以這支吟釀主導作配襯，原來此清酒，當配上不同食材之菜式時，竟會有各種不同層次的味道，另近年興起用紅酒杯飲清酒，更能特出其清酒之特性及味道，入口時少少甘甜、有果香，而後段我覺得有少少辛辣這支吟釀單價只是$550，而這套餐已包括了一支，超抵。

套餐未到前先有一個前菜供應，是海蜇絲及豆腐乾切條，醬汁不太濃，加埋一齊有淋有爽之不同口感，可先開開胃口。

日本冷蕃茄

套餐前菜是一份日本冷蕃茄沙律，是用上由日本空運到港之溫室蕃茄，新鮮清爽又多汁，配上青菜及少少沙律汁，夠哂健康，夏日消暑良品。

赤目張

配上純米吟釀菜式開始了，首先品嚐是赤目張，其實6月份沒有特別魚類當造，而餐廳選用之目張魚屬於淡味魚類，為了配合魚身不同部位之口感與味道, 所以用了兩種不同的切法。

餐廳將赤目張魚背位置薄切，魚肉爽口，味道淡淡的；而魚腩位置則厚切，可保留其油脂，雖魚味清淡，但配上清酒則帶動清酒之甜香。

鮑魚仔生姜煮

店方事先將鮑魚起肉，再用上生姜煮，味不算很濃，又不會過甜，鮑魚仔夠鮮味、夠嚼勁又不難咬開，當配上清酒時，甜味更出，配下一味又會是？

清酒煮蜆

餐廳用上特定-直紋蜆殻的Asali蜆，再用上清酒煮，蜆肉又滑又彈牙，而且鮮味十足，清湯充滿甜香及清酒味，我喝了三碗，另外原來配上套餐上之清酒時，甜味與之前不同之餘，蜆肉會變得更滑。

自家製南瓜薯餅

到炸物了，這南瓜薯餅，配酒一流，外層炸得香脆又不會過火，食落裏面之南瓜與薯蓉雖然有點過油同綿綿的，但兩者均很清甜及味道濃郁，再配上清酒，清清口中油膩，少了甜味，反而酒味開始出來了。

鹽燒香魚

店方之燒物用上日本之串燒長木炭，加上師傅之經驗，所以燒物做得不錯，此香魚外層用鹽巴包住來燒，鹽香及脆卜卜之餘，裏面魚肉又軟軟淋淋的，有些少細骨，怕骨的朋友要小心，配上此清酒，能帶出甜香之果味。

麵豉串燒長州雞，串燒泡菜牛肉

到串燒了，一來就兩串，有時不要只看賣相，雞肉串的顏色淡淡的，好不吸引，但肉質嫩滑及軟諗，配上麵豉醬後味道又不錯；而那串泡菜牛，牛肉比較鞋身，但配上泡菜又好少少，不過此味很易令人誤會是韓國菜式，放於日本菜單中，雞配上清酒後，令清酒變得滑啲，反而牛配清酒後，泡菜同牛肉將酒味蓋過了。

牛油果天婦羅

第一次食牛油果天婦羅，每人半個，感覺頗特別的，炸漿做得算不錯，本身軟滑的牛油果已有其香味，所以沒有多餘的調味，同樣配上清酒，天婦羅的輕油份，令酒更爽口。

山芋醬油漬吞拿魚飯

吞拿魚飯作結尾，吞拿魚用醬油漬過，所以魚味更濃郁，口感亦軟滑，加上滑滑的山芋，兩者纏綿交替，有幸福的感覺，而飯粒晶瑩亦帶煙韌，再喝啖清酒，以此作結尾，真的不錯吧。

除赤目張及清酒煮蜆之上菜是2人份外，其他上菜都是1人份，另多謝攪手請客，本身個餐都好抵，想再抵啲，記住訂位啦。

Hokahoka

地址 : 銅鑼灣駱克道491-499號京都廣場9樓

http://www.openrice.com/mobile/sr2.htm?shopid=127353

請不忘讚好我的專頁：

Personal Blog: https://francocheungcarcarchan.blogspot.com

Facebook Fans Page: https://www.facebook.com/francocheunggf

Weibo: weibo.com/cckfranco

OpenRice: http://www.openrice.com/restaurant/userinfo.htm?userid=30018880

Happy birthday to me?

以前會覺得生日要一大班朋友跟你慶祝才會高興及有面子，我又不會有這麼厚臉皮去指令朋友替其辦幾個生日局，而且要此朋友俾錢去齊幾個生日局，為的是令人覺得佢有好多朋友幫佢慶祝，但人大了，已經再沒有此好勝感覺了。

喜記蟹將軍，很久之前已聽過這名字，會令人想起食辣蟹的地方，而且價錢也不便宜，加上之前卡卡醬表哥曾任行政總廚，所以更加深印象，最近店方推出一些特色菜單，而且價錢相宜，所以相約食友一同去會一會蟹將軍，先試試前菜小食

藍梅山藥

賣相及創意已值八十分，山藥即淮山，切成條狀，好似層層疊咁，爽口又少少粉，頂部淋上紫紅色甜苺醬，好少見，幾特別。

當歸鵝翼

滷水鵝翼就食過，當歸鵝翼就第一次，鵝翼夠冰涼，輕輕的當歸味，與藍梅山藥一樣，夏天食完涼浸浸。

招牌將軍令

懶人之選，師傅將蟹拆肉後，再炸成為巨型蟹鉗，底部放大量金蒜用以座起巨型蟹鉗，氣勢有如將軍令般架勢，蟹鉗肉質彈牙，金蒜炸得夠乾身及辣(是平時避風塘辣蟹之金蒜)，用來撈粥、麵、飯一流。

豉椒炒蜆

基本上大部份食海鮮地方都有，不過要看看事前功夫處理得好唔好，因為啲蜆要吐沙，否則成口沙就唔好食，喜記的做到了，蜆肉亦夠飽滿，屬少辣，如果無咁鹹就更好。

椒鹽雙拼(椒鹽九肚魚拼鮮魷)

通常椒鹽菜式，一係叫九肚魚，一係叫鮮魷，今次一次過滿足哂兩個願望，脆漿夠薄身，做得不錯，又不會過鹹，九肚魚夠滑溜，鮮魷又夠軟身，不錯。

黑松露菠菜汁鮮蟹鉗

通常在酒店或高級餐廳才可品嚐此菜式，而且價錢也不便宜，現此道菜式與將軍令正做優惠，每客只售$68，其實菠菜汁鮮蟹鉗已有賣點，今次加了黑松露片，即時升格，先嚐蒸蟹鉗，喜記之肉蟹來貨是不錯的，肉質夠甜夠厚，可惜蒸過火了，啲肉老咗少少，本身菠菜汁淡淡的，但蟹肉之鮮味及黑松露片之香味滲咗入啲汁，所以當湯來飲，另外，以菜式排序以言，由淡至濃，建議將此蟹放於炸物前，又以現今相機食先嘅社會，如果與將軍令同時上菜會更能特出其特色，更有賣點，更能吸引客人。

鮮蟹肉蒸釀冬菇

大大隻冬菇釀入鮮蟹肉，蟹肉鮮甜足料之餘又好咬口，不錯。

金牌牛肋骨

喜記除以辣蟹為名物之餘，其實牛肋骨也是店中名物，不可不試，席間有兩位美女食友話好難食，但即時被其他食友反駁，原來因為兩人最先只挾了牛肋骨最外面炸得焦黑嘅一小注部份，所以係燶的，當二人挾返另一件食完後，反應不用說了，而做法是用美國牛肋骨燉完後再炸，表面脆口焦香之餘，肉質仍能保持鬆化，口感豐富 ，再配以牛骨底之蒜蓉汁後，味道更昇華，重點推介。

濃湯鮮茄雲耳田園蔬菜

一輪重口味菜式後，到蔬菜時段了，有鮮茄、雲耳、黃牙白，配以濃湯，夠健康，清一清口腔後再食，我連湯都清哂。

招牌蟹油炒麵

之前已食過幾次，對上一次食過但太鹹，今次準備菜單時無點此味，原來因為我生日所以送的，麵條不嬲都炒得夠乾身、夠惹味、夠特色，除自家製的蟹油是靈魂之餘，炒麵時之配料銀芽、韮菜等，亦是不可缺少之部份，會有特別的化學作用，如果只有蟹油炒麵，雖然已經夠好味，但又好像少了甚麼似的。

鮮蟹肉蠔仔泡飯

服務員叫我哋要影相就要快，因為一定要襯熱即整同即食，個鮮蟹肉粥底本身未到時，服務員先將炸咗嘅脆米粒放入碗內，之後個粥底鍋一到及供我哋相機食先後，將蠔仔及蟹肉粥放入已放脆米粒之碗內再上枱俾大家，蠔仔夠飽滿夠，與蟹肉同樣夠鮮，粥底仍然夠熱，煲過嘅粥同炸過嘅脆米一齊食，好有層次感。

香滑流沙包

我不是甜魔，但都會食甜點，一籠香滑流沙包，好食嘅流沙包，除咗夠熱外，奶黃餡滑溜與否，從包中流出之程度質感也是重點，喜記做到了，當撕開流沙包，奶黃餡溜出了，有奶香之餘，包又夠鬆軟，正。

楊枝甘露

另一甜品楊枝甘露，味道較淡但奶味又好重，反而食唔到芒果味，建議加多些芒果汁。

杞子桂花糕  

生日又送樣，哈哈，糕身晶瑩剔透，可見到杞子及桂花在糕內，可食到桂花香味，又不會過甜。

Happy Birthday to me，多謝大家，整晚菜式屬水準之上，更是喜歡食蟹同懶人之選，如果可將某些菜式之次序配搭、火喉控制加以改善會更出色，而且價錢相宜，此豐富菜單，每人約$300內，抵食。

喜記蟹將軍 Heekee crab general

地址 : 銅鑼灣謝斐道440號地下及地庫

http://www.openrice.com/mobile/sr2.htm?shopid=141468

請不忘讚好我的專頁：

Personal Blog: https://francocheungcarcarchan.blogspot.com

Facebook Fans Page: https://www.facebook.com/francocheunggf

Weibo: weibo.com/cckfranco

OpenRice: http://www.openrice.com/restaurant/userinfo.htm?userid=30018880

三顧砵蘭街將軍，未能全會六壯士

三顧砵蘭街將軍早兩個月朋友D話最近砵蘭街有好嘢，佢話啲雞都幾正㗎，叫我一齊去試下，我心諗係真唔係呀？不過大家唔好心邪，佢係講緊響砵蘭街開咗幾個月嘅將軍拉麵。

老闆不是日本人，好鍾意食拉麵，自己去日本試過數不盡之拉麵後，鑽研出不同湯底、配料及食材配合，繼而做出六款不同拉麵，分別有鹽將軍，醬將軍，噌將軍，蒜將軍，金將軍，雞將軍，我稱之為六壯士，我居然在兩星期內三顧將軍。

2014-04-29(Tue)

第一次是由朋友D帶我到將軍拉麵，因為到處都是叉燒拉麵，既然來到砵蘭街，當然要叫雞，因為不是自己填拉麵選擇，是直接向服務員點菜的，點了

金將軍($84)

金將軍是一碗雞拉麵配咖哩湯底，食拉麵通常都會先喝湯，湯底用上日式咖哩，再配上濃濃的豬骨湯，所以做出一個香濃惹味嘅咖哩湯底，不會太稠又不會太稀，相信是因為加咗煮淋嘅洋蔥，想食拉麵一刻，*服務員提醒要將雞蛋撈勻才食先好味，我左望右望都唔見有溏心蛋，在那呀？原來響啲蔥花、蔥絲下有一隻生雞蛋，於是撈勻後再飲多一啖湯，味道更覺豐富，再食一口麵，以本地製作算不錯，比曾很出名之豚王麵身粗少少，掛湯力也不錯，如果麵身可以再硬一點就更好，算合格，雞肉幾滑，不會太鞋。

麻醬凍蕃茄($28)

無理由淨食拉麵，另點了麻醬凍蕃茄，蕃茄夠大個又新鮮，再於蕃茄上放紫菜絲及淋上芝麻醬，味道不算太濃、有芝麻香及少少酸，略嫌雪得不夠凍，如果再雪凍啲，夏天食是個開胃的選擇。

麻醬凍豆腐($28)，跟蕃茄一樣用了同樣的芝麻醬，本身凍豆腐已經少少甜，加上芝麻醬味道更特出。

巨峰提子乳酸飲品($22)

除咗巨峰提子，還有荔枝、青蘋果味，其實平時好驚響出面飲巨峰提子/黑加侖子等味道，因為好多都會係藥水味，不過呢度又無喎，加咗梳打水，算夠凍同有汽水，幾好飲。

和風煎餃子($36)，餃皮算煙韌，饀料都夠熱，食得出不是自家製，煎得算不錯，味道都算合格。

芥末炸雞($34)，其實是單骨雞翼炸至金黃色，外皮炸得香口，可能已將雞翼切成單骨，炸時容易控制火喉，所以不會太乾，隨雞附上的芥末醬，配雞更覺惹味。

(不過菜式名會容易令人誤會是用芥末醬混入/醃製雞翼才炸，直接用"日式炸雞"名，但附上芥末醬會更覺驚喜。)

2014-05-05(Tue)

平時都會周圍食食食，今次同幾位食友下午再訪將軍試試水準，已提醒服務員叫師傅將拉麵煮超硬。

蒜將軍($80)

今次試咗蒜將軍，主要是配上大量香蒜，再配以叉燒及半隻溏心蛋，未食已聞到濃烈蒜香，又是先喝啖湯，蒜味夠濃郁，但不好蒜頭的可能會怕怕，溏心蛋有蛋香，有半流芯效果，算不錯，义燒是見到師傅在廚房即叫即燒，從店內已經可以聞到，叉燒肥瘦、厚薄也適中，師傅燒得不錯，煙韌有肉味又夠油脂，再吃麵條，雖比上一次硬身，但仍然可以再硬啲。

再食咗麻醬凍蕃茄($28)，今次雪得夠凍，好食好多；另點了荔枝乳酸飲品($22)，我個人覺得好飲過巨峰提子。

叉燒生菜包($32)

當上枱時，見到有幾塊叉燒，下面有生菜，我哋仲問邊個另外點咗碟叉燒，我哋話點咗叉燒生菜包，原來係用生菜包住叉燒嚟食，焦香叉燒脂肪均勻，是師傅用火鎗燒的，加上醬汁、蔥花等，想像不到的好味。

2014-05-06(Wed)

晚上再與食友到訪，期間已見人龍在門外，今次我食

雞將軍($88)

雞將軍與其他五將軍不同，是炒拉麵，用雞肉、洋蔥及醬汁一起炒，上碟後再加蔥花、紫菜絲、鰹魚碎等，其實之前一日已試過少少，今晚再試真啲，個炒拉麵個味好熟面口，係啦，係大阪燒嗰隻味，即係酸酸地同喼汁味，又同樣唔係個個鍾意食，之前一日炒得乾身同硬身啲，今晚比較濕啲同淋得滯。

三顧砵蘭街將軍，未能全會六壯士，問過師傅及服務員，也會有人要求影廚房，如不太忙都可以的，如果忙會讓廚房外影，另外拉麵盡可能都會逐碗整，之前兩次到訪都要等好耐先有得食，而且三次水準都不一，不過如果水準可以好似第一、二次就好了，否則.........愛莫能助。

將軍拉麵 Shogun Ramen

地址 : 旺角砵蘭街99號地下

http://www.openrice.com/mobile/sr2.htm?shopid=163794

請不忘讚好我的專頁：

Personal Blog: https://francocheungcarcarchan.blogspot.com

Facebook Fans Page: https://www.facebook.com/francocheunggf

Weibo: weibo.com/cckfranco

OpenRice: http://www.openrice.com/restaurant/userinfo.htm?userid=30018880

同追女仔一樣，不要三心兩意。

沙田新城市廣場有一個特色，任何餐廳都有人排餐飽，但有時真的無需要排咁耐，因為啲人通常貪心而周圍攞定飛，等邊間快啲就食嗰間，最後未必係自己想食嗰間，另外沙田新城市已推出新app，提供店鋪優惠以及用e-Table從網上訂枱，相信有好多人已從網上取票，不過好多餐廳過咗3張票要從新取票，可能人未到已過咗號碼，又或者已在其他餐廳進食中，其實只要同追女仔一樣，當你鎖定目標，不要三心兩意，好快就到，好似今次咁，取2人票後要等7至8個號碼，諗住要等20至30分鐘啦，但我號碼之前有4至5個號碼無人應，所以只不過等了4至5分鐘便可入座。

美麗華集團從韓國引入之人氣餐廳School Food，早前已於銅鑼灣駐紮，下星期Festival Walk School Food Grand Opening，因撞期而未能出席，所以今天同友人早啲嚟試下先，此店舊址是悅翠小廚，食物都還可以，收費又不貴，但最後都敵不過...........

是日點咗

烏卒卒($68)，好似好似黑蟋蟀，school food呢個烏卒卒，是一客墨魚卷，飯用墨魚處理過，幾特別，好食。

韓式冷麵($72)，夏天食一流，將冰同冷麵撈勻後食，夠涼快又夠辣，麵質夠彈牙煙韌，暑氣全消。

香煎韓牛饀餅($62)，是用薄餅夾住煎過嘅牛肉碎，薄餅面淋上韓式汁，再點酸忌廉食，不錯，如果啲牛肉碎可分佈至薄餅裏面多啲就好啦。

半溶芝士炒年糕($70)，溫馨提示：如果真係食得辣先好叫，否則後果自負，年糕本身無乜味，好煙韌，點咗啲辣汁後，嘩，好辣呀！啲浸住響汁嘅泡菜仲辣，但係好刺激又幾好味，因為好辣，所以做咗個小實驗，將年糕放入冷麵嘅凍汁裏面，點之真係無咁辣，不過啲年糕急凍咗後變成好硬，好難成，千祈唔好試。(家長指引：蕃茄醬是經過特別訓練的，屋企嘅小朋友唔好試)

熱情香芒艾菲($98一壼，足夠6杯以上)，是芒果汁連肉再加梳打水，倒入杯前要攪勻，甜甜地又有少少氣，頭先食年糕救咗我一命。

四款食物加一壼飲料，連加一共$407，如果是女孩子，其實足夠3或4個人食(可以再叫多一兩款)，應該$200一位便可，另餐廳有冷熱水供應，不過要同服務員要求才提供。

School Food

地址 : 沙田沙田正街18號新城市廣場一期1樓107號舖

http://www.openrice.com/mobile/sr2.htm?shopid=169664

請不忘讚好我的專頁：

Personal Blog: https://francocheungcarcarchan.blogspot.com

Facebook Fans Page: https://www.facebook.com/francocheunggf

Weibo: weibo.com/cckfranco

OpenRice: http://www.openrice.com/restaurant/userinfo.htm?userid=30018880