其實你食過真正香港滑嫩嘅豬紅未？

每星期我都會食車仔麵，但無話特定去邊間，而銅鑼灣有幾間都會常去，係因為個辣汁、鷄翼尖而幫襯，其他食物水準只是不過不失，豬腸豬紅更是普通貨色，我就真係未響榮記食過滑嫩到同台灣鴨血相比嘅豬紅同坊間難尋嘅肉厚肥美豬腸，基本上榮記整體水準已不大如前。

如果要細數滑嫩嘅豬紅，相信太子弼街近花園街嘅明記麵食可入三甲，為何會到太子明記？因為隔兩個鋪位有一店專賣浮牀、水泡、水槍及其他玩具，我之前船河經常幫襯，價錢比西貢平很多，而最近又要攪泳池派對，所以出來格格價，順便食一食真正滑嫩嘅豬紅。

我印象中明記差不多二十年都無乜裝修過，面向店內左邊是煮麵，而右邊牆是一張長檯及高櫈，大約有5至6個位，需要面壁食麵的，而門外面對煮麵位置也有2-3個坐位供人客使用，排隊落單、等麵、俾錢後才揾位。

人總是貪心的，無理由單點豬紅麵，最後點了幼生麵、豬腸、豬紅、牛筋、蘿蔔(共$36)，單看豬紅已經覺得滑溜，先飲一啖湯，湯頭幾濃，相信係因為加了牛筋啲汁；豬腸算肥美，算好咬口，但不夠入味，是普遍貨色；再食一啖麵，好重鹼水味，咁多年都無變；牛筋夠入味，有滑又有煙韌的，但又唔係最好的牛筋；蘿蔔夠入味，無根但好硬身；主角出場了，呢度嘅豬紅是一片片的，表面已可見滑嫩，第一片豬紅一啜即滑入口中至喉嚨呑咗，好彩唔係太熱，如果唔係一定淥熟喉嚨，第二片小心啲，雖然滑但咬落去其實又煙煙韌韌，真係好複雜嘅感覺，又滑嫩又煙靭，真的可與台灣麻辣火鍋之鴨血相比，其實你食過真正香港滑嫩嘅豬紅未？

明記麵食

地址 : 太子花園街174號地下

一碗富貴粥

因為作感冒，所以去咗佐敦嘅一間桑拿揼骨蒸一蒸，順便睇埋阿仙奴vs利物浦，點之又俾利物浦咁好命又咁好彩唔駛輸波，睇完波抖到八點就起身去揾早餐食，仲病病地，想搵碗粥食下，新興棧就最好不過，好耐未來過了，呢度主打魚類嘅粥，你叫得出魚嘅部位，大部分都有，除非賣哂，仲要最平嘅一碗粥都要$37，最貴可以去到$5X，其他非粥類如薑蔥/白灼魚頭、咀、骨、腩、卜就要$73。

我是一個真窮鬼，又想食魚、又想食肉，所以點碗最平而又可以雙併嘅肉丸魚片粥($37)，我聽到其他食客點嘅粥全部都$50起，佢哋又叫油炸鬼($10)、又炒麵($25)、薑蔥魚卜($73)，嘩，埋單咪過百？

終於等到肉丸魚片粥來了，呢度又有一個特色是每碗粥上面都會放大量生菜絲，其實又幾健康呀，粥底綿滑又夠鮮甜，魚片剛熟夠爽口，粥內已加薑絲，配粥一齊食可辟魚腥味，不過要小心魚片有細骨，肉丸彈牙又好咬口，真的做得不錯，如果我有錢，下次一定再來食碗過$50嘅富貴粥。

新興棧食家

地址 : 油麻地寧波街23號

電話 : 2783 8539

內行人？

之前響網上見到有人話響金華冰室識食墨西哥包就係內行人、先係識食人士，唔怪之得你咁識食啦！

星期六下午，約咗人，又早咗出嚟未夠鐘，見金華唔多人，即刻入去搵個位坐，點了菠蘿油($9)，凍檸茶($18)，菠蘿包是暖的，根據內行人食法(其實我只係扮內行人)，首先將包用义㩒扁啲先食，外皮尚算酥脆，包也算軟身，喜歡牛油的我略嫌牛油不夠大塊，食到一半已沒有牛油，還是喜歡西貢的。

為咗要更似一個內行人同識食人士，就算死都要叫番個墨西哥包扮下嘢先啦！墨西哥包($6)，我識嘅內行人食法又是用义先㩒扁包身，薄薄的外皮勉強脆，包是微暖的，少少甜，跟其他麵包店沒太大分別，誰說內行人才懂得點？

飲品當然繼續點較早前從網上得知「甜飲全球每年殺18萬人，凍檸茶是兇手之一」成日害人不淺嘅兇手凍「檸茶」，我當然唔怕死，呢杯飲料算夠凍，但茶味不夠。

金華冰廳

地址 : 太子弼街47號地下

電話 : 2392 6830

對於我而言，是一個健康早餐

一早要到葵興辦一點事情，辦完後有啲肚餓，原來葵興新開咗叫九龍貿易中心，都有十間八間餐廳，不過太早，有啲仲未開門。

行過Grove，見啲早餐好似幾吸引，價錢又唔貴，就呢間啦，扮下西人，所以點咗份英式早餐($33)，凍檸茶(凍飲+$2)，等待期間見店員不停將三文治refill入店內近門口之雪櫃、又見一個不停整沙律放入膠盒中，相信午市不少客人外賣。

英式早餐到了，其實嚇了我一跳，因為都幾大份，有兩隻太陽蛋、兩條長煙肉、一條鷄肉腸、半個番茄、炒磨菇、焗豆同一件多士。

太陽蛋煎得不錯，底部夠燶，蛋黃及蛋白仍能保持八成熟；煙肉同鷄肉腸鹹咗少少；番茄幾新鮮，鮮甜又多汁；磨菇不似炒過的，似白烚多啲，反而我覺得健康啲；焗豆是熱的，罐頭貨，不過不失；多士也算熱但未夠脆，塗上牛油後，喜歡麵包的我，好快已消滅它，整體上都算一個健康早餐。

飲品當然繼續點較早前從網上得知「甜飲全球每年殺18萬人，凍檸茶是兇手之一」成日害人不淺嘅兇手凍「檸茶」，我當然唔怕死，呢杯飲料算夠凍，但茶味不夠濃。

那會個個是王子？

網上騙子多的是，那會個個是王子？相信好多人聽過了，但係唔知點解呢啲騙子又可以繼續呃人，世界上邊有咁多王子呀！

話說本身去尖沙咀隆堡麗景酒店AVA開會，但又突然改咗去圓方開會，順便食埋晏加補祝拍檔生日飯。

大家都成日挨夜，所以諗住叫個湯飲下，服務員建議點午市精選孖寶($398)，足料老火湯(例窩)及西班牙黑毛豬义燒，我見本身單點义燒已經要$268，所以點咗呢個再加幾款點心。

服務員先將一小碟XO醬($18)及一碟半個已切成4小件之月餅(相信為白蓮蓉月餅$18)放枱上，相信此為前菜小食，也是一種廣告手法，如果好食，可能有人會即刻買。

海鮮茘芋盒($30)，落完單2分鐘便到，是暖的，我是喜歡食芋頭的，食不出有甚麼海鮮在內，大致上味道不過不失，但會否叫荔芋角比較適合？

沙參玉竹茨實湯，開頭以為是普通例湯，原來是老火湯(可見湯渣已見絕不馬虎)，碗湯夠濃味又夠甜，由於有一拍檔仍未醉醒，未能出席，所以同行拍檔飲了3碗，而我飲了2碗。

西班牙黑毛豬义燒，已經不是第一次食黑毛豬义燒，睇下呢度水準如何？义燒烤至微微焦香，而且肥瘦分明，肉質鬆化之餘又好咬口，真是不錯。

陳皮牛肉球($30)，味道沒有甚麼特別，陳皮味比較重，而且牛肉用肉粉重手咗。

有機野米珍珠鷄($30)，蒸得過火，糯米超諗，鷄肉餡料又太碎，所以覺得味道好普通。

蘿蔔絲香酥餅($30)，不知為何炸物做得麻麻，是用油方面出了問題？外皮顏色好像欠缺甚麼，不過裏面之蘿蔔絲夠熱、夠甜、夠入味。

店內環境、服務、衛生質素都不錯，但點心就水準麻麻，所以話網上騙子多的是，那會個個是王子？做人做事以及食飯都不要單看表面，OK臉是因為水準錯的义燒同老火湯，下次會再試小菜，加埋2罐可樂($20x2)，茶($15x2)、小食、XO醬，連加一埋單$686。

王子飯店 (尖沙咀)

地址 : 尖沙咀柯士甸道西1號圓方1樓1028C號舖

電話 : 2577 4888

http://www.openrice.com/hongkong/restaurant/-/149312

請不忘讚好我的專頁：

Personal Blog: https://francocheungcarcarchan.blogspot.com

Facebook Fans Page: https://www.facebook.com/francocheunggf

Weibo: weibo.com/cckfranco

Follow franco_cheung_gf on Instagram

https://instagram.com/franco_cheung_gf

OpenRice: http://www.openrice.com/restaurant/userinfo.htm?userid=30018880

Ublog:

http://blog.ulifestyle.com.hk/blogger/francocheung/

炎丸有高達保護我食原始燒

來自東京嘅炎丸居酒屋，店內其中一個特色是餐廳中間是用作原始燒位置，用備長炭以高溫烤出食材，最近推出多款嶄新菜式，收到食友組團飯局，更有幸是能同食界兩大抽濕機同場食飯，不枉此生。

時代廣場有高達展覽，商場外有一座巨型高達，而店內另一特色是近門口及原始燒前，有一個跟人一樣高大之高達坐鎮，是時代廣場唯一一間認可放有高達之餐廳。

首先出場是燒原個日本洋蔥，本身日本洋蔥已經好好食，而炎丸嘅做法係原個先隔水蒸後才將洋蔥去用炭火燒，再切開四份，洋蔥仍能保持水份，洋蔥片少少辛辣但又少少甜，我食咗2件。

火炙鹿兒島和牛伴松露柑橘醬油，雖說是火炙和牛片，其實只是輕炙而已，所以仍能保持嫩滑鮮香，和牛片上黑松露油味香濃，柑橘味又清香，再加有秘製醬油及底部之洋蔥，味道清新之餘更將和牛推高至另一層次；而火炙吞拿魚漬配牛油果伴青芥末汁，又是嫩滑的吞拿魚夾住一件滿佈青芥末汁嘅牛油果一齊食，味道幾夾，個汁好好味。

松葉蟹肉田園沙律，雜菜、番茄本身已好新鮮，加入黑松露油後，再將脆麵包碎、松葉蟹肉一齊撈勻，味道更鮮更甜；岩手縣南部雞腿肉原始燒，一隻來自岩手縣不便宜的上等鷄腿，外皮燒得金黃香脆，而肉質同樣嫩滑；炸男前豆腐伴白蘿蔔蓉，男前日文意指猛男，而男前豆腐來自京都名店，在日本非常出名，炸漿薄薄的，裏面食到豆味濃郁兼香滑，我又食咗2件；熊本Rindo豚肉西京味噌，眼見件豚肉有些部位好瘦，而我揀了有肥膏之豚肉件進食，肉連膏一齊食，肉嫩而膏又有油脂香，我食咗3件。

原始燒連子鯛，日本人喜歡於婚宴或喜慶場合，以綢魚入饌，因日文鯛與喜慶同音節，取其好運意思，這條連子鯛是由餐廳中間之原始燒位置用備長炭高溫燒烤，魚身鮮甜肉嫩。

七厘燒(迷你炭爐網燒)，岩鹽厚燒牛舌，店員在枱上放了一個已着火之小型炭爐，上面已有一塊岩鹽，首先用青檸汁塗上岩鹽後再放上厚切千舌，燒一分鐘左右後再反轉燒另一邊，厚切牛舌鹹鹹的，幾好咬口但又少少煙韌，正。

和牛魔王卷，之前已食過和牛，所以追加和牛魔王卷，和牛依然嫩滑鮮香，和牛上面之黑松露更香，配上壽司飯一齊食，非常滿足。

炸芝士松葉蟹腳，松葉蟹腳肉質本身已經鮮甜，再用芝士包住炸，是我喜愛的一味。

鹿兒島和牛烏冬，店員將熱辣辣之清湯倒入生和牛片上灼熟，而和牛下面是已預先煮好之烏冬，剛淥熟的鹿兒島和牛，肉嫩清甜，烏冬夠煙韌。

鱈場蟹海蝦海鮮鍋，單是鱈場蟹腳、海蝦、油甘魚已經好吸引，而湯底更是以鷄骨、鷄腳及豬骨熬了多個小時，由於已經食咗多款海鮮同和牛，所以只要咗些菇類加湯，個湯真係鮮甜到不得了。

因之前一晩飲到天光，仍然宿醉，所以只眼見其他食友飲酒，而自己只飲冰水。

炎丸居酒屋 (銅鑼灣)

地址 : 銅鑼灣勿地臣街1號時代廣場10樓1001A舖

電話 : 2721 9955

http://www.openrice.com/hongkong/restaurant/銅鑼灣-炎丸居酒屋/163008

請不忘讚好我的專頁：

Personal Blog: https://francocheungcarcarchan.blogspot.com

Facebook Fans Page: https://www.facebook.com/francocheunggf

Weibo: weibo.com/cckfranco

Follow franco_cheung_gf on Instagram

https://instagram.com/franco_cheung_gf

OpenRice: http://www.openrice.com/restaurant/userinfo.htm?userid=30018880

Ublog:

http://blog.ulifestyle.com.hk/blogger/francocheung/

蘭桂坊The China Bar殺上諾士佛臺？

雖然我係去開蘭桂坊Club飲嘢嘅人，但相信蒲開蘭桂坊嘅朋友都有去過The China Bar，而我有時都會Clubs未開門時去China Bar飲杯先去clubbing。

原來The China Bar於一個月前在諾士佛臺開了分店，場內面積比蘭桂坊更大、樓底更高、室外更有枱櫈供客人飲酒食煙，跟蘭桂坊一樣有DJ及舞池。

點了一碟墨西哥脆片，Nachos底下全是半溶芝士，而Nachos上面有酸忌廉、Guacamole(鱷梨沙拉醬 - 是一種墨西哥涼拌醬)，用Nachos點著綠色Guacamole同白色酸忌廉，酸酸地，少少甜，Nachos又香脆，食唔停口。

其實飲咗好多酒，Relax Riesling, Champagne, Apple Ciders, Whiskey, shooters.....但唔記得影相，亦分不清甚麼味道了。

The China Bar

地址：尖沙咀諾士佛臺10-11號地下

Address: G/F, No. 10-11 Knutford Terrace, Tsim Sha Tsui, Kowloon

Tel: 23671011

Opening hour: 4pm-6am

西環又多一間墨西哥菜了

Cali-Mex越開越多間，已經開到西環了，而且單是西環已經好似有4間墨西哥菜，看看是否能突圍而出，見大部分是外國幫襯居多，可以堂食，約有40個位，另主打做外賣及速遞服務。

我是窮鬼，所以點了星期一特價之半份中辣雜豆墨西哥薄餅($58)及一樽芒果汽水($28)，芒果汽水先給我，只是有芒果味之汽水，無特別。

而堂食會派一個通訊器，待響時便可取食物，等了5分鐘左右就響，隨即到吧枱取食物，雖說半份，但有4件，都幾大件，還伴有酸忌廉、牛油果醬、生菜絲、番茄碎粒，而薄餅內本身會有特選芝士同番茄碎，夾住餡料雜豆，分別為慢煮黑豆及白豆，好足料，薄餅烘得夠香，但芝士味不算太濃，食落煙煙韌韌，反而兩種豆之豆味一齊食時更香同更突出，點埋酸忌廉及牛油果醬更惹味，可以是素食之選！

Cali-Mex (西環)

地址 : 西環堅尼地城吉席街70號地下

http://www.openrice.com/hongkong/restaurant/-/457349

請不忘讚好我的專頁：

Personal Blog: https://francocheungcarcarchan.blogspot.com

Facebook Fans Page: https://www.facebook.com/francocheunggf

Weibo: weibo.com/cckfranco

Follow franco_cheung_gf on Instagram

https://instagram.com/franco_cheung_gf

OpenRice: http://www.openrice.com/restaurant/userinfo.htm?userid=30018880

Ublog:

http://blog.ulifestyle.com.hk/blogger/francocheung/