剛去完日本、希臘，返香港後好想打邊爐、食茶餐廳、打冷、韓燒同繼續食日本食物，由於仍放假中，所以蕃茄醬於閒日下午帶我去一次滿足兩個願望，日式打邊爐，蕃茄醬帶我行女人街(即通菜街)，近登打士街與豉油街一段，心諗女人街會有好餐廳？行到一座剛翻新之大廈 Deli2，就跟了蕃茄醬去了三樓的 盛八日式火鍋放題店。
由於已過了午市時段，所以不太多人，只見到十多位學生，而午市套餐可選擇60分鐘(由$58-$148)或90分鐘(由$108-$298)放題，當然不同價錢提供的肉類質素相對不同，但相同的是可任取自助食物檯上的蔬菜、丸類、麵類、熟食、飲料、甜品、雪糕..........等，基本上每款食物試一件，已經飽到不能動，而是次行動是為了飛驒牛，當然點了$298 - 日本極上飛驒和牛任點任食，之後就返唔到轉頭了。
既然點了最貴的極上飛驒和牛，當然要點個配合的湯底，壽喜燒湯底就最好不過了，更特別是加入麥茶，無咁油膩，另外最好加入洋蔥及大蔥，令湯底味道更出，不過雙蔥要向服務員要求才會提供，由於不同價錢的放題都一定會有嚴選豚肉，所以服務員二話不說就放低兩盤豚肉，之後就上了一板極上飛驒和牛。
嚴選豚肉，肉質也算嫩，其實已經不錯，但今次目的是極上飛驒和牛，所以.........先來一盤，飛驒牛肉身之顔色紅裏透出白色脂肪，單是賣相已值95分，而且飛驒牛肉紋清晰，只需在壽喜燒湯底中淥3至5秒左右便可，請相信我，不需點醬料已經好好食，飛驒牛牛味濃郁，一放入口即溶，不但嫩滑，而且無渣，真係暫時和牛中返唔到轉頭之選，確是極品。
也點了美國特選牛肩，澳洲貴族和牛，此兩款牛肉質素已經很好，當你吃過飛驒牛之後，確是比了下去，澳洲貴族和牛甚至食到"鞋"嘅感覺，反而美國特選牛肩比起澳洲貴族和牛更好咬口，味道更濃。
說真的，單是食2盤飛驒牛已經值回票價，所以只取了少許丸、菇、公仔麵及冷蕎麥麵，味道還可以；喜歡飲凍飲的我在自助汽水機來回多篇，雪櫃還有紙包飲品，另有一雪櫃放杯裝甜品，所以都幾衛生，而甜品仲有雪糕同朱古力噴泉，但胃納有限，下次一定會再來。
沒有留言:
張貼留言