每天都有食肆開業、結業，你敢賣就有人買，話說有一段時期在灣仔附近上班，所以經常到蘭杜街之焱川食好好食嘅鰻魚飯，有時都會去對面榮式燒雞扒，咁今晩下雨天經過灣仔諗住再去焱川懷緬下個鰻魚飯，點之..............嚇到我幾驚青，最後原來只係搬咗去春園街，咁諗住行過去，點之行到浦和樓下，突然好大雨，但係點解浦和咁光猛？原來.......已結業，而家叫老爺點心，剛試業中，既然咁大雨，咁上去試下啦，可能係老天爺意旨呢？
可能係試業關係，除我哋外，只有另一枱客，環境感覺舒適的，枱與枱之間不會太窄、又有單丁高枱位、又有梳化位等，相信老闆都幾鍾意玩魚蝦蟹，眼見茶壼餐具除筷子外，連窗口玻璃全部都有印住「老爺」字樣，甚至碟嘅設計係由魚、雞、蝦、蟹圖樣圍住中間有「老爺」嘅字樣，而字樣外係用一個類似兩個金錢疊住，而看似一個葫蘆，咁就成副魚蝦蟹了，不過只係我推測，亦無問店員屬實與否，但是所有都見到花心思的。
原來除了點心外，還有一些特色小菜，但價錢也不便宜，如果一班人來會比較化算，今晚只有2人，只好食點心，經理介紹了幾款點心，而我哋又點了幾款再加一盅炖湯。
石斛螺頭炖烏雞($98)，説真的，如果賣$58還可接受，但$98少少貴，因我只見一件烏鷄、一舊瘦肉、幾條石斛、三粒連殼螺(螺頭呢？)，個湯望落幾清，不過都算甘甜。
蜂巢荔芋角($38)，食到有兩件個皮少少韌，有一件正常，整體不夠鬆化，餡料正常味道。
荷塘金魚餃($68)，賣相真係幾似金魚，摺餃手工做得不錯，金魚皮尚算煙韌，不過裏面餡嘅蝦可以做得更爽同更彈牙。
黑椒和牛酥($48)，賣相有90分，如果做法無變，就算用普通食材都應該一樣好食，外層酥皮做得夠鬆化，裏面碎和牛粒同其他餡料味幾夾。
墨汁小籠包($58)，基本上墨汁是無乜味的，咬開時見到個餡有少少黑色(相信是墨汁做成)，但如果要令人知道是墨汁小籠包就最好加多啲墨汁連湯響裏面，要一咬開就要有黑色墨汁流出來，最好食到扒牙黑哂仲正，不過整體味道是不錯的。
老爺頭獎包($68)，是6件老爺頭型嘅包，用匙將小碗內撈有炸脆片碎、菜甫粒、肉粒、冬菇粒等食材放入包內，少少辣，幾得意，一啖一件，味道不錯。
鮮蝦翠竹卷(兩食 - $48)，外皮炸到似腐皮卷，方便吸湯是不錯的，蝦也是新鮮的，同金魚餃一樣可能做得更彈牙，點蝦個湯應該落咗胡椒，我直頭飲咗啲，少少辣同鹹，係用心機整的，不過用嚟點咗蝦係食唔出呢個湯嘅味道，整體上是不錯的。
飲品當然繼續點較早前從網上得知「甜飲全球每年殺18萬人，凍檸茶是兇手之一」成日害人不淺嘅兇手凍「檸茶」($18)，我當然唔怕死，呢杯飲料夠凍夠茶味，合格，最後加多一支可樂($12)。
其實都好飽，最後諗住只叫一個甜品，可能經理見我哋都食咗咁多嘢，所以送咗每人一個薑汁撞奶凍($18)同楊貴妃甘露($58)。
薑汁撞奶凍，雖然好細杯，但堅係成杯仔都食到薑汁味，上面之碎啫喱已經食唔到乜味，唔係求其整的，奶凍夠凍又算夠滑，好食；楊貴妃甘露，夠凍，食到係新鮮芒果、柚子，西米無黐埋一齊，椰奶及芒果汁份量做得不錯。
整體水準算不錯，不過都算幾貴，經理已經送咗點品同計咗八折(可能試業關係)後都要$365，下次叫多啲人食可能平啲，另提提大家，大廈業主立案法團正維修走廊之男廁，所以要大家一齊共用女廁，都幾唔方便，希望可快些完成工程，另某食物水準能夠保持及某些可以做得好些，就係咁老爺點心來了難道佳(蘭杜街)？日後會更佳。
老爺點心
地址 : 灣仔蘭杜街4號
電話 : 2328 8938
Feel free to like/follow my page:
Personal Blog: https://francocheungcarcarchan.blogspot.com
Facebook Fans Page: https://www.facebook.com/francocheunggf
Weibo: weibo.com/cckfranco
Follow franco_cheung_gf on Instagram
沒有留言:
張貼留言