朋友新餐廳試業，當然要同朋友上去捧場，好在早到，因之後好快全場爆滿，從大廈最高層25樓一出電梯，可見餐廳中間位置是一個正方形大酒吧，而圍住酒吧有十數張高櫈供客人飲酒或用膳，可清楚看見調酒師在內調酒，餐廳亦選用開放式廚房，客人可欣賞廚師如何烹調美食，另外近窗口位置亦有4至5張枱，由於身處25樓，除可看到高樓大廈外，也可看到遠處山景。
我們三人被安排到一張二人枱，雖然少少迫，不過也可以接受，其實都點了不少食物，但張枱位置有限，拍照也比較困難，所以只介紹幾款水準比較好食的，當然也會介紹少少要改善的食物及服務質素。
其實我食飯好少飲酒，所以點了冰水，而朋友話個welcome drink幾好飲，前菜點了香煎五色胡椒呑拿魚伴芒果醬($168)，賣相已值80分，呑拿魚外層煎得夠香、裏面仍處於半生狀態，配上五色胡椒一齊食，更帶出鮮味，反而食唔到有芒果醬味道，另底層之couscous是健康的蒸粗麥粉，味道也是靠用甚麼來烹調而帶出其味道，不過不是太多人知道是甚麼，也不是很多地方有得食，我之前去過摩洛哥及附近地區每天也食，是北非國家之主要食材，叫古斯文，又可叫庫斯庫斯或蒸粗麥粉，由粗麵粉製造的，而形狀和顏色都跟小米非常相似。
牛油白酒煮藍青口($188)，藍青口是細隻的，肉質好滑嫩，仍有好香白酒味，再配上已切碎番茄、意大利肉腸及牛油汁，俾我清了2/5碟。
點哂三款湯，野菌黑松露忌廉湯($85)、法式洋蔥湯($75)及西瓜凍湯($70)，首先飲西瓜凍湯，上面雖然加咗啲香草，但真係好似飲緊西瓜汁，味道幾得意；法式洋蔥湯，又是工序多多的一款湯品，正常要用兩個半小時才可完成，洋蔥湯夠清甜、洋蔥炒得夠香，夾住芝士同麵粉團一齊食，煙煙韌韌，不錯；野菌黑松露忌廉湯，前兩款都好飲，呢碟最好飲，野菌已用攪拌機打碎，黑松露夠香，湯夠creamy又滑，大家都喜歡。
主菜到了，燒慢煮墨西哥春鷄($178)，本身已燒得好香，肉質尚算嫩滑，再點埋個秘製辣汁就更惹味。
咸豬手配德國香肉腸($368 - 2人享用)，好大隻咸豬手，皮燒得幾香，好重酒味，肉夠實但又好彈力，如果再切細件啲更好，德國香肉腸，是幼身的，煎得夠香，肉質還可以，酸菜沒有過酸，可清清味蕾。
甜品時間，點了72%朱古力心太軟($75)及咖啡酒牛奶凍($45)，72%朱古力心太軟，是有朱古力漿流出來的，72%朱古力夠濃但又沒有太甜，再配上淡淡的雲呢拿雪糕一齊食，冷暖在熱情之間，反而朋友非常喜歡，建議雪糕放碟旁，因為上枱時已開始溶緊；另咖啡酒牛奶凍，好重baileys酒及咖啡味，牛奶凍口感香滑，不錯。
可能因為試業，所以出菜時間未能掌握得好，服務員亦沒有介紹上枱之菜式是甚麼(我是沒有問題的，是朋友出聲)，幸好經理向我們講解，單看價錢是走高檔路線，希望遲些會有改善，其實以本人而言，只要食物質素好就可以，我對環境及服務要求不高(酒店及高級餐廳另計)，而設計好與否，直頭不需理會。
Sky726 (旺角)
地址 : 旺角彌敦道724-726號25樓
電話 : 2390 3889, 2390 3088
網址 : http://www.openrice.com/hongkong/restaurant/旺角-sky726/449547
請不忘讚好我的專頁：
Personal Blog: https://francocheungcarcarchan.blogspot.com
Facebook Fans Page: https://www.facebook.com/francocheunggf
Weibo: weibo.com/cckfranco
Follow franco_cheung_gf on Instagram
https://instagram.com/franco_cheung_gf
OpenRice: http://www.openrice.com/restaurant/userinfo.htm?userid=30018880
沒有留言:
張貼留言