多次相約去香港仔南灣如心酒店Lis Cafe食晏都約不到，因為友人呢個月返中班，所以才能抽空到訪，約正午12點去到香港仔，真係考到我，不過又算幾快，去到紅隧啱啱有隧巴171，紅隧加香港仔隧道都無塞車，未夠10分鐘到酒店對面落，堅快！
未夠12點上到去Lis Cafe，全塲得我一個客人，心諗會唔會中伏？友人未到，望下自助沙律吧，都有唔少選擇，
有幾款不同麵包、不同生果、不同沙律食材及多款不同醬汁。
有番茄水牛芝士、煙鯖魚、不同種類之火腿、蛋沙律。
有炸物、冷麵、螺絲粉、南瓜沙律。
友人到了，坐低後侍應遞上電子餐牌，可以揀$138之自助沙律、湯及甜品，咖啡或茶，原來連咖啡或茶都係任飲；另可揀自選主菜，由$168至$228不等，同樣可享用自助沙律、湯及甜品，咖啡或茶。
我點了星洲海南鷄飯($208)，之後出去攞咗蛋沙律、粟米粒、番茄水牛芝士同南瓜沙律，幾款都是我喜愛的，蛋沙律上面鋪滿蟹籽，蛋黃高膽固醇，所以取蛋白多，但又有沙律醬，味道算OK；粟米粒，甜甜的，算健康的；番茄水牛芝士，番茄幾新鮮，夠鮮甜，水牛芝士煙煙韌韌，但又柔軟香滑；南瓜沙律，南瓜煮得夠腍，好香又高纖維，正；另攞咗碗老黃瓜老火湯，夠甜又夠火候，爭啲想飲多碗。
星洲海南鷄飯，先食一啖油飯，油飯粒粒分明，鷄肉尚算滑嫩，鷄皮不會太肥，點埋三色醬嘅薑蓉、酸辣汁、黑豉油令鷄肉更入味；另跟餐碗白菜湯一樣夠火候又入味，又飲哂！
友人點了干炒牛河，試咗少少，條條河粉上色均勻夠味，牛肉剛剛熟，好咬口，最正係呢度用友人至愛余均益辣椒醬，相信呢度中菜做得比較有要求同出色。
原來近門口之甜品櫃內之甜品全部可以點，有部分忘記拍照，有麵包布甸、柚子蜜蛋散、窩夫、紅豆酥餅、日本芝士餅、巧克力布朗尼。
我取了麵包布甸，柚子蜜蛋散、日本芝士餅及布朗尼；麵包布甸不太甜，麵包不太腍，而布甸入口即溶；柚子蜜蛋散，甜甜又鬆化；日本芝士餅，芝士味不會太濃，餅底夠軟身；布朗尼，朱古力味比較甜但又好食，蛋糕夠硬身，正！
因朋友要趕返工，所以食到1點半左右要離開，其實已經好飽，如果自助餐控一定回本；離開時見到餐廳六、七成滿，啲人邊度走出嚟？
下次要入嚟住下同游水先。
請不忘讚好我的專頁：
Facebook Fans Page: https://www.facebook.com/francocheunggf
Weibo: weibo.com/cckfranco
Follow franco_cheung_gf on Instagram
https://instagram.com/franco_cheung_gf
OpenRice: http://www.openrice.com/restaurant/userinfo.htm?userid=30018880
Ublog:
http://blog.ulifestyle.com.hk/blogger/francocheung/
沒有留言:
張貼留言