蕃茄醬與卡卡醬花生飲食遊記: 石澳半天遊

一早食完早餐返公司開完會後，下午就一家人去石澳游水，本身已經買咗香檳、芝士、風乾火腿、生果，揾咗位，租完沙灘遮後，我步行去更衣室換短褲期間突然肚餓，所以行咗去揾嘢食，經過張泮記見到唔少人但又仲有位，又衝入去試下，提提大家呢度係無冷氣的，如果唔係一陣會游水，我係唔會揀呢度，見到午餐都有五、六款選擇，價錢由$40至$45不等，仲要加凍/熱飲品只加$5，響石澳呢啲旅遊區算好抵，又見都幾多人食緊午餐E: 王牌即焗先茄朱扒飯($45)，照樣點午餐E，凍檸茶，侍應會同你講話要等十幾分鐘，等，當然等。

十幾分鐘後，王牌即焗先茄朱扒飯上枱了，侍應提醒小心好熱，而眼見啲茄汁仍沸騰中，為食的我已急不及待用匙羮開始進食，店飯真係好熱，我先從旁邊開始食，熱辣辣又有焦香嘅茄汁配上炒飯底真係幾好食，炒飯底夠乾身，再從頂層食落去，菠蘿烤焗過仍然多汁及好食，再加上洋蔥、鮮茄、溶咗又少少焦嘅芝士一齊食，大滿足，豬扒事前功夫做得不錯，肉質夠腍身但又不會過腍，有咬口又不會太乾，滿足的午餐。