蕃茄醬與卡卡醬花生飲食遊記: 赤柱鴨王

星期五晚上，本應要出席翠華餐廳「暫別蘭桂坊派對」，但一早約了朋友到赤柱晚飯，所以之後飛的士返出中環，朋友話唔想成日都西餐，因此我揀了Pinot Duck，一去到朋友見到門口時話都話唔食西餐，我叫佢跟我入去先講。

雖說見到門囗像一間西餐廳，但內𥚃切切實實是一間中式菜館，仲要大部分菜式都是賣鴨，大部分鴨貨源都來自美國，只有一款菜式是用法國鴨，今次可以做鴨王了，仲要係美國鴨，先點了兩客烤鴨美饌，分別有北京填鴨薄餅($68)及北京填鴨荷葉包($68)，兩款都是傳統的北方菜式。

北京填鴨薄餅，一碟兩件，剛好一人一件，用薄餅包住肥厚美味的鴨肉、青瓜條及京蔥，一咬就已經食到油脂及肉汁湧出的鴨肉，而青瓜及京蔥之作用是減去烤鴨皮肥膏之油膩。

北京填鴨荷葉包，此味是用蒸籠上的，也是一籠兩件，所以熱辣辣，用上傳統的北方厚身夾餅夾着跟北京填鴨薄餅差不多食材之肥厚的鴨肉、青瓜條、京蔥等，夾餅之熱力將烤鴨之油份迫了出來，所以食得更邪惡。

食了兩款邪惡之填鴨，要點些飲品解解渴，呢度無供應凍檸茶，不過有供應本地自家製手工啤，而且自設私家工場及限量製造，所以都幾特別，仲改了一些得意又霸氣的名字，最衰我戒了啤酒多年，如果唔係一定要飲哂去，另外有Wine及Cocktails，我晏啲仲有排飲，所以最後點了一杯酒味不太濃之Cocktail叫Taste of East($90)，用上洛神花、黃瓜汁、薄荷、杜鬆子酒(Gin)，Gin味及薄荷味不太濃，反而洛神花香味更濃，甜甜的，而且不是很多地方有用洛神花做的飲品，可以值得一試，但我覺得比較適合女性；而朋友點了杯Pinotini($90)，有伏特加、柑曼怡香橙甜酒、香檳及菠蘿汁，單看酒類配搭已醉醉地了，我平時自己調酒也喜歡用香橙甜酒，會令到成杯酒更香甜，我試咗一啖，是幾濃酒的。

點了一碗鴨絲酸辣湯($68)一齊食，點解用食？因為湯頭幾稠身，都幾足料，啖啖都食到不同食材，有鴨絲、冬菇、筍、豆腐干、木耳、煙辣椒等，雖有辣椒在內，但湯頭不會太辣。

惹味五香鹽酥鴨($88)，是一度炸物，用鐵板載住上菜，建議店員提醒食客小心鐵板柄，因為眼見鐵板沒有煙霧出，但原來是非常熱的，廚師將4支鴨鎚厚肉位置向底，4支骨位向上再交疊，令到不用工具也能企了起來，是有花心思的，這味鹽酥鴨皮夠酥脆，非常香口，算炸得乾身又不會太油，而鴨肉算肉嫩又不會太乾，仍能鎖住肉汁，好味。