蕃茄醬與卡卡醬花生飲食遊記: 週日活動：西班牙黑毛豬臘腸、潤腸、臘肉

上星期日同卡卡醬一同於牛頭角金瓊庄酒業香港有限公司出席咗一個西班牙黑毛豬臘腸、潤腸、臘肉配白酒、紅酒活動，甚麼是西班牙黑毛豬我不多介紹，大家自己上網睇，而黑毛豬臘腸及臘肉除咗有種種黑毛豬的好處之外，其反式脂肪每100g低於0.1g, 比傳統的臘腸及臘肉更為健康，是老人家也可以吃的健康臘腸及臘肉，負責人向大家解說是獨家代理，除此之外，此處還有一種特別服務...........就是獨特的釀酒服務，客人可以自由選擇，包括葡萄汁到果皮，之後由選酒、發酵、裝瓶、甚至設計酒瓶標籤，製作一瓶至一批屬於自己的葡萄酒。

原來呢度仲係甄文達廚藝中心(香港辦事處)，呢兩年我都獲邀出席灣仔會展美食展有甄文達作示範烹調之傳媒活動，仍回味當日之美食。

回歸正轉，首先由負責人講解其公司服務及運作，同一時間大廚亦已準備三款用黑毛豬臘腸、潤腸、臘肉作餡料之點心，分別有臘腸荔芋酥、臘肉煎餃子及潤腸壽司卷，負責人介紹用點心配以白酒Liebfraumilch。

其實我係未醉醒的，因為飲到天光，所以可能無乜味覺，我自己以食物淡至濃味次序開始食，先食潤腸壽司卷，食到有青瓜、蛋及潤腸，雖然賣相不佳，但壽司飯是做得不錯的，而比較油的潤腸少少甘香，再配上比較清嘅青瓜同蛋，算幾㚒，再飲啖甜甜而質感又厚身的白酒，以本人而言，算清清味蕾；再食臘肉煎餃子，食到餡料有菌類，而臘肉的味又不算太出，其實同食普通日式煎餃子無分別，是煎得幾好，不過算幾特別；臘腸芋頭酥，酥皮做得不錯，一口咬了一半，見到是足料的，臘腸餡料加芋泥酥皮，是一款味濃厚的點心，但我覺得配红酒好些。

之後西班牙黑毛豬臘腸、潤腸出場了，負責人稱配紅酒Amarone Classico，先食臘腸，油脂甘香，薄片算有咬口，但潤腸不算太甘香，可能期望過高，反而配上果味濃紅酒後，更能帶出雙腸之甘香，算合格了。

最後有一咖啡師親自示範沖的精品咖啡，教大家用Trung Nguyen再加Kopi Luwak(貓屎咖啡)泡製一杯美味咖啡，連不好咖啡的我都覺得入口清醇，沒有飲到任何雜質，超香咖啡味，期間再配上大廚的檸檬芝士餅，可減去芝士餅之膩度，另芝士餅做法是半軟身的，入口半溶，芝士味夠濃，負責人再加了兩款甜酒蘋果果酒及香蕉菠蘿果酒給大家配芝士餅，兩款甜酒甜甜的，非常適合女仕飲用。