蕃茄醬與卡卡醬花生飲食遊記: 居然海鮮好過肉類？

自從年紀增長，對自助餐或放题已不感大興趣，因為我已實行少食多餐之計劃，除非某主打食材非常吸引，否則..........好難令我感興趣，大家都公認我是一個窮L，但卡卡醬又喜歡食燒肉，所以揀了我幾年前食過覺得水準不錯之燒魂一，因為呢度都好多食物選擇，各有各揀喜歡食，訂位時大致上分兩時段：6-8pm及8:15-10:15pm，價錢由$228至$298不等，包一罐飲品，視乎週一至週四定週五至週日，但又有一個9:30pm嘅夜宵時段，週一至四$228，五至日$238，還有長者同小童優惠。

訂了星期六的下午6時，食呢啲放題特色是不可遲到，因為唔同踢足球，係無補時的，所以5點55分已經到達登記等候入閘，搭正6時，由多位服務員帶領已安排好之位置，二話不說就攞點菜紙係咁剔，亦由一位服務員用揚聲器講解點菜程序及提醒寫枱號及人數，不要浪費食物，所以我只點了蔬菜系、海鮮系、刺身系及牛系，每樣少少，試試水温。

首先來了些蔬菜，有生菜、牛油鷄脾菇、有機超甜菠蘿、甘脆肉瓜；喜歡食燒菠蘿多過生菠蘿，燒完鎖住啲汁，更香更甜，其他三樣都無太特別。

之後來了兩款海鮮，有北海道香草牛油帆立貝及深海大蝦；帆立貝溶雪做得不錯，夠厚身又不會雪得太硬，由於已加了香草牛油，燒起來更香，食起來肉質夠甜又少少滑溜；深海大蝦燒得夠乾身之餘肉質又夠彈牙，質素真的不錯。

也來了兩款刺身，有劍魚腩及吞拿魚；兩款刺身溶雪步驟做得不錯，沒有太多雪味，劍魚腩算肥美，吞拿魚也算新鮮。

牛系來了，有黑毛霜降和牛、熊本一口和牛、薄切牛舌及牛𥚃肌；誰說是黑毛霜降和牛，牛肉色澤真是幾靚，但不知為何無乜肉味，反而一口和牛反而合格，油脂從火燒中迫出來，有牛味又好邪惡，牛舌同牛裡肌都好咬口，肉味更出。

食完第一round，試了帆立貝不錯，所以再點些一人份量海鮮，又有帆立貝，加了日本小玉貝、岩鹽靜崗鯖魚、味椒鹽多春魚、沖繩小烏賊；帆立貝不用多說了，小玉貝非常鮮甜多汁，不過食時要小心燙嘴，鯖魚同多春魚本身也是不滑的，兩者燒完之皮少少香脆，前者肉質比較腍身，後者肉質比較乾身之餘魚春夠香口，小烏賊燒得夠滑嫩(是否未熟？)，好食。

又加了一碗蟹粥，食到有蟹肉、昆布、鷄蛋、冬菇，成碗粥好鮮甜，好足料。

期間另再點了兩罐汽水(每罐$18)、一支蒸餾水($8)及兩杯冰(每杯$5)，最後海鮮再追加一人份量帆立貝、日本小玉貝；而刺身亦加了一人份量之三文魚、呑拿魚、劍魚腩、鮑片及大甜蝦；最後冷稻庭烏冬作結尾，七點十五分左右已叫last order，七點三十分已要埋單，八點準時離開，其實好飽但又有好多食物都無點，唯有下次再食，結論係居然海鮮好過肉類？